भोटेकोशी बाढीमा बेपत्ता भएका परिवारलाई मधेसी एकता समाज नेपालद्वारा आर्थिक सहयोग

लहान । रसुवाको भोटेकोशी क्षेत्रमा आएको बाढीका क्रममा बेपत्ता भएका मधेस प्रदेशका ८ परिवारलाई मधेसी एकता समाज नेपालले आर्थिक सहयोग गरेका छन।

बाढीको क्रममा बेपत्ता भएका मधेश प्रदेश अन्तर्गत रहेका प्रत्येक जिल्लामा एक -  एक  परिवारलाई रु २० हजारका दरले आर्थिक सहयोग गरेका छन। त्यसै क्रममा सिराहाको सखुवानन्कारकट्टी गाउँपालिका–१  घर भएका सल्देव यादवको परिवारलाई मधेसी एकता समाज नेपालले रु २० हजार आर्थिक सहयोग गरेका हुन।

विपद्का कारण परिवारका सदस्य बेपत्ता भएपछि कठिन परिस्थितिबाट गुज्रिरहेको परिवारलाई राहतस्वरूप समाजले आर्थिक सहयोग उपलब्ध गराएको हो। मधेशी एकता समाज नेपालका संयोजक डा. बबी सिंह शिव कुमार महतो लगायतको उपस्थितिमा पीडित परिवारलाई सहयोग रकम हस्तान्तरण गरिएको जनाइएको छ।

बाढी तथा प्राकृतिक विपद्का कारण परिवारको सदस्य गुमाउने वा बेपत्ता हुने अवस्था अत्यन्त पीडादायी हुने भएकाले यस्तो कठिन समयमा पीडित परिवारलाई साथ र सहयोग आवश्यक रहेको समाजले जनाएको छ। आर्थिक सहयोगले तत्कालीन आवश्यकतामा केही राहत पुग्ने अपेक्षा गरिएको छ। सहयोग हस्तान्तरण कार्यक्रममा विपद्को समयमा पीडित परिवारप्रति ऐक्यबद्धता जनाउँदै मानवीय संवेदना र सामाजिक सहकार्यलाई निरन्तरता दिनुपर्नेमा जोड दिइएको थियो। समाजले विपद्मा परेका नागरिकलाई सहयोग गर्नु केवल आर्थिक दायित्व नभई मानवीय जिम्मेवारीसमेत भएको सन्देश दिएको छ।

यस घटनाले प्राकृतिक विपद्का कारण प्रभावित परिवारलाई स्थानीय समुदाय, सामाजिक संस्था तथा विभिन्न क्षेत्रबाट सहयोग र सहकार्यको आवश्यकता अझ स्पष्ट पारेको छ। आफन्त बेपत्ता भएको पीडामा रहेका परिवारलाई आर्थिक सहयोगसँगै मनोवैज्ञानिक तथा सामाजिक साथसमेत आवश्यक रहेको सहभागीहरूले बताएका छन।